يالهوووووووووووووووووووووووي
جيت وكنت متوقعه ان بعد شفيق الدنيا خلاص كده شكرا بس لا الدنيا مش كده.... الدنيا بعده كانت احلى بصراحه اتعرفت علي زكريا كان شاب ميه ميه الصراحه كنت كل اما ابصله احس اني ببص في مرايه... كان نفسي من اول مره شوفته اني افضل معاه العمر كله بس يلا النصيب بقى...عرفته في وقت صعب اوي اني افكر ارتبط تاني...كنا نعرف بعض معرفة سطحية لحد اما اتقابلنا صدفة كان بيكلمني كأنه يعرفني من زمان وانا كنت كده طبعا ولا كان يخطر على بالي ال هيحصل بعد كده... عرفته مشاكلي كلها واني كنت اعرف شفيق وانه كان انسان مستهتر ولعب بيا كتير وانا ال كنت هابله كان انسان متفهم فعلا وعرفني انو كان واخد باله مني من فتره وانا مكنتش اعرف....بصراحه فرحت بس في الاول كان خيال شفيق ادامي بيطاردني كأنه بيقولي محدش هيخدك مني بس بصراحه زكريا قدر في وقت بسيط يحببني فيه عشت معاه بجد احلى ايام كنت بتمناها من الدنيا.
أولا كان من أولها معايا صريح قالي انا ظروفي كذا وكذا طبعا وافقت على طول شخص زي ده قليل اوي لما تلاقيه حتى هوه كمان بيقول عليا نفس الكلام..
المهم اتفق انو هيتقدملي وفعلا وفى بوعده قالي اننا هنقعد فتره وانو ظروفه الماديه هتتحسن مسك شغلانه جديده وربنا كرمه بس بدأت احس بعد كام شهر انو مبقاش طبيعي حسيت انو بدأ يضغط عليا وحسيت انو فكرني زي ما بيقولوا فرخه بتبيض دهب سهمي معايا في كذا لا هاتي كذا لا مش عارف ايه وبقى يتأمص من اقل حاجه ويحسبني على الرايحه والجايه مع انو مش من حقك واخرها انو مش عوز لا يجهز ولا يعمل اي حاجه طبعا بدأت احس اني وقعت في بلاعه تانيه اغوط من ال قبلها بدون تفاصيل لاني بجد قرفانه من الشخص ده اديته استماره 6 وسربته ... كل ده وشفيق قال ايه بيحاول يرجعلي تاني في الفتره دي واخرتها قلت يالهووووووووووووووي
المهم اتفق انو هيتقدملي وفعلا وفى بوعده قالي اننا هنقعد فتره وانو ظروفه الماديه هتتحسن مسك شغلانه جديده وربنا كرمه بس بدأت احس بعد كام شهر انو مبقاش طبيعي حسيت انو بدأ يضغط عليا وحسيت انو فكرني زي ما بيقولوا فرخه بتبيض دهب سهمي معايا في كذا لا هاتي كذا لا مش عارف ايه وبقى يتأمص من اقل حاجه ويحسبني على الرايحه والجايه مع انو مش من حقك واخرها انو مش عوز لا يجهز ولا يعمل اي حاجه طبعا بدأت احس اني وقعت في بلاعه تانيه اغوط من ال قبلها بدون تفاصيل لاني بجد قرفانه من الشخص ده اديته استماره 6 وسربته ... كل ده وشفيق قال ايه بيحاول يرجعلي تاني في الفتره دي واخرتها قلت يالهووووووووووووووي
هوه فيه ايه؟؟ -الجزء الثاني
"الو........انت تاني ..ايوه يا سيدي خلاص خلاص مش هشتم..في ايه بقى بجد" ده ال انا قولته والراجل كان بيكلمني وهوه مرعوب وانا كنت مرعوبه اكتر منه ,فجأه لاقيته بدأ يرجع تاني لطبيعته ويتكلم المهم سألني للمره الخماشر اذا كنت سندس ولا لا فجأه قولتله" انا سندس انا زفته متخلنيش اتغابى عليك تاني...هوه في ايه؟؟"
المهم الراجل شم نفسه ولقيته بيقولي "انا من وكالة ناسا الفضائية وده بجد والله انا ما بشتغلك, عموما انا هدخل في الموضوع بصي يا انسه سندس...حضرتك كنت كتبتي قصه قبل كده أعتقد ان اسمها "الغرباء"
انا انذهلت وجاتلي صدمه لان انا ما حكتش لحد عن القصه دي غير الواد حتحوت وال اعرفه عن حتحوت انو زي حالاتي كده لا له في الطور ولا الطحين.......المهم رديت عليه وقولت"وانت عرفت منين بقى ومين قالك عليها انتو بترقبوني دانتو نهاركو اسود انا يا.........."
"يا ستي والله العظيم مارقبناكي انت بس خلقك ضيق ليه كده صلي على النبي..احنا بس لقيناها اعتقد انها ضيعه من عندك بقالها فتره صح؟؟" قمت فتحت درج مكتبي عشان اشوفها موجوده ولا لا ملقتش حاجه "يبقى انتو ال سرقتوها ايوه ..دانا هبهدلكوا والنعمه" فجأه لقيت صوت الراجل اتغير كده ولقيته بيزعق فيا " بقولك ايه لو مبطلتيش قله ادب وزعيق انا ال هتغابى عليكي احترمي نفسك بقى واسمعيني للاخر الله دانا بقالي ساعه مش عارف اقولك كلمه ايه القرف ده " انا بيني وبينكو اتكتمت الراجل قفلني واقحمني بطريقه خلتني مفتحش بؤى تاني لحد اخر المكالمه كل ال كان طالع عليا حاضر وطيب ونعم.. لحد الاخر... الباشا خلص وانا طبعا زي الحمار ولا فهمت حاجه
المهم قفلت معاه وانا مش عارفه اقول ايه غير اني فضلت قعده على السرير دماغي تودي وتجيب يا نهار اسود القصه بتاعتي قلبت حقيقي...
هوه ال بنعمله في الناس هيطلع علينا ولا ايه؟؟؟ قفلت الموبيل ودخلت نمت زي الجزمه لحد اما اشوف الخيبة دي :(
هوه فيه ايه؟؟ -الجزء الأول
نغمة فيروز بترن في ودني "ياااااااااطير" وانا نايمه متأخر وعوزه اقوم اكسر ام الموبيل ده, عملته سايلنت وانا مغمضه عيني ومش عارفه ازاي لحد دلوقتي, المهم من خيبتي عملتو فيبريشن طبعا بدأت اتعصب واتنرفز قمت ما سكه الموبيل ورفعته لفوق وقمت..........
رديت "الو" واذا فجأه الاقي صوت راجل كبير كده له هيبه يعني ولقيته بيكلمني وبيسأل بالانجليزي وبيقولي
Is this miss sondos
قولتله نعم ياخويا....الراجل طبعا مفهمش .قولتله انت طالب نمره كام..الراجل قعد يرطم شويه انجليزي وانا كنت ساعتها بنام اصلا كل ال فهمته من كلامه انو واحد رتبه كبيره يعني في وكاله ناسا..
انا بمجرد اما سمعته بيقولي وكاله ناسا قمت واتعدلت ومسكت امه تهزيق وشتيمه وقباحه لا تتصوروها كل ال فكراه من القباحه دي اني قولتله" هيه نقصاك بروح امك على الصبح اشتغالات احنا هنستعبط ولا ايه بقى انت متصل عشان تشتغلني يا بن ال..........والنعمه لو اتصلت تاني هنا هيبقى يومك لون قفاك وتييييييييييييييييييييييت"
المهم الراجل طبعا على ما اعتقد مافهمش حاجه بس من طريقه كلامي وقله ادبي ساعتها الراجل اتصدم واتكتم وقفل...
بعدها بساعه لقيت نفس نغمه فيروز بترن في ودني ايه اليوم ال مش فايت ده...بس المره دي من رقم مجهول مكتوب كده والله هوه يعني ايه رقم مجهول عموما مش موضوعنا...المهم رديت لقيت واحد المره دي بيتكلم عربي الله اكبر وبيقولي بس بعربي مكسر كده هوه حضرتك الانسة سندس؟؟ رديت برخامه "ايوه نعم خير" رد عليا بادب احرجني جداااااااا" حضرتك احنا من وكاله ناسا الفضائيه وكنا عوزين حضرتك........." انا سمعت ناسا تاني ونزل فاصل اخر من القباحه وقله الادب المتوقعه وغير المتوقعه "هوه انتو يا ولاد ال..........عملين عليا دوريات انا عارفه مين ال مسلطكوا عليا يا ولاد ال.......وهجيبه قولولوا سندس مش هتسكت وهتجيبك قال ناسا قال دانا هخيلي يومك اسود من قرن الخروب " انتهى الفاصل مع صدمه اخري للراجل وال قفل ومقدرش يستحمل للاخر...
دخلت نمت تاني وانا مقتنعه بعد قله الادب والمجهود الجبار ال قام بيه لساني ان محدش هيتصل تاني ورجعت للحلم ال كنت بحلمه قال وانا قعده على البحر وفجأه الكوره اتخرمط قامت البلكونه وقعه.........
المره دي رنت نغمه فيروز للمره التالته بس من رقم غريب جداااااااااا شكله كده من بره منين بقى الله اعلم انا ابعد رقم رن عليا كان السمبلاوين باين...عموما المره دي بدات احس اني ال مستهدفني ده مش شخص عادي....مسكت الموبيل وانا هموت من الرعب يا ترى ارد ولا ما ردش فضلت بتاع دقتين متردده ارد ولا ما ردش.............ياترى ارد ولا لا ؟؟؟؟؟
(يتبع)
ما أغبى الرجوع إليه
"يا عينك يا جبيرك" كل اما اشوف وشه اقولها.. ادامي كده عيني عينك مفيش دم, بجد ال اختشو ماتوا من زمااااااااااااان
بيني وبينكو كان نفسي اخده واشويه على الفحم لحد اما يولع بس تقول ايه بقى لقلب الام وشحتة طبعا ال خبطني جملة مش هنساها ابدا " بطلي تعيشي اغاني فيروز دي بقى معدش في الكلام ده"
انا بعيش اغاني فيروز يا ولاد ال........عموما اهو احسن من ال بيعيش الوهم ويقنع نفسه انو حاجه وهو ولا حاجه
اكتشفت انو سي شفيق الباشا الحبيب ارتبط بست الحسن والجمال ال كانت معاه اخر مره وال سابني عشانها معرفش ليه
عموما معمرتش هوه تاريخ صلاحيته مع اي حد شهر ورجع يقول "أنا حسحس وحسحس انا"
طبعا انا فترة الشهر دي في بدايتها كنت منهاره تماما بس مش ادامه طبعا كنت منهاره مع نفسي ادامه كنت ببقي اسد لكم ان تتخيلو مدى الالم وانا بمثل ادامه دورين دور في الحقيقة وهوه البت الجامده ودور في المسرحية ال كنا بنشتغل فيها وال كنت بعمل دور مراته وال كان فيها مشهد المفروض اني بستفذه فبيقوم سفخني قلم وطبعا خدت القلم بجد عشان نسيت الحركه ال المفروض تتعمل وكنت يوميها هقتله واحنا على المسرح بعد اما لفيت حوالين نفسي بتاع مرتين..
رجعلي بعد شهر بالظبط انا حتى مش فاكره هوه قالي ايه وايه كان المبرر ال خلاني ارجعله تاني مع ان كان ادامي شخص تاني كان ممكن ارتبط بيه بس ده عبط طبعا
المهم رجعنا واتعدل وبقى فله شمعه منوره هوه اسبوع يا مؤمنين ورجعت ريمه لعادتها القديمه قرفت بقى انا عوزه اعيش بسلام وده يعشق الحوارات ونظرية المؤامرة ..حرب بجد ربنا ما يوريكوا..
بعدها بمفيش والله روحت وقفه ادامه وقمت قيلاله " شفيق البطاريه فضت انا زهقت انت هتفوق امتى؟؟"رد عليا ببرود كنت هولع في نفسي بعديه "ايوه يعني انت عوزه ايه دلوقتي؟؟"قولتله "هوه ده ال ربنا قدرك عليه, انا ال عوزاه انك تتغير زي مانا بحاول اتغير" الاسطوانه اشتغلت فجأه "أنا كده وهفضل كده وانت ارتبطي بيا وعارفه اني كده "
فجأه لقيته بيتكلم وانا مش سمعه صوت خالص كل ال في ودني صوت وش رهيب حتى انا كنت بدأت احط ايدي على ودني من كتر الازعاج ال انا سمعاه فجأه لقيته بيبوصلي وبيقولي في ايه "مالك انت كمان بتسدي ودنك عشان ما تسمعنيش طيب عموما انا عوز امشي بعد اذنك انا ماشي" وقام سيبني وماشي وانا حاسه ان في جردل ميه ساقعه وقع عليا عشان يفوقني نزلت السلالم كأنها سلمه واحده ودموعي نازله بالعبيط وبضحك كأني سمعت نكته قبيحه جدا انا حتى يوميها خفت لاكون اتجننت ولا جرالي حاجه فكرت اروح اكشف..بعدها روحت اشتريت عسليه وكلتها مع اني مش بحبها مش بقولكو كان لازم اروح اكشف ................
وكل ال كان في دماغي ساعتها اغنيه نجاة "ما أحلى الرجوع اليه" ال بعد ال حصل ده اتحرفت الى "ما أغبى الرجوع اليه"
الباشا حبيب
"نعم ياختي" فجأة لقيت نفسي بزعق في صفية صحبتي اول اما لقيتها جايه تقولي " اسكتي مش شحته صاحب المنيل ال انت مرتبطه بيه جاي يقولي انهارده قال ايه الواد شفيق جايب بت كده قال تشتغل معاكو"
فجأه وبلا مقدمات لقيت نفسي في حته كده وادامي سكاكين وسواطير كتير وحواليه دم كتير وقال ايه اللهم اجعله خير ماسكه في ايدي سكينه كبيره وبقطع في حاجه ايه هيه الله اعلم ..بعدها فقت لقت شفيق ادامي ومعاه بت كده شكلها لا مؤاخذه بقى وبتتقصع كده ومش مظبوطه خالص..بيني وبينكو البت شكلا نيله استغفر الله لكن جسما مليانه بس مش مزه يعني جيت احاول اتقصع زيها معرفتش قولت اتنيلي بقى سيبي التقصيع لاصحابه, الهانم قعدت جمبه وانا كنت باكل في ضوافري لحد اما وصلت لكوعي والبت كل شويه تبصله وتضحك وانا عوزه اقوم اكل دماغها بس الصبر حلو ولا ايه..اليوم عدى اسود على دماغي قال وانا ال كنت جيباله عسليه معايا واجي اديهاله يقولي مبحبهاش دانا جيباها من ام 75 قرش يعني مش اي حاجه المهم جينا وقت المرواح استناه عشان يجي يوصلني ولا الهوا انده عليه يقولي ثواني والثواني بقت دقايق والدقايق بقوا ساعه ..فجأه لقيتني بشده من الجاكت وبقوله "هوه احنا مش خلاص ولا ايه؟؟" قالي "اه خلاص" وانا زي الهطله مش فاهمه معنى الكلمه
المهم الناس كلها نزلت وكنا بتاع الساعه 8 بليل عملت فيها ال مأموصه ومشيت ادام ولا حد عبرني مشيت بسرعه عشان حد يندهلي ولا حد عبرني, هجري كمان شويه ولا الهوا واذ فجأه قولت اما ابص ورايا كده اشوف في حد ولا لا
اتصدمت..تخيلوا لقيت ايه؟؟؟؟؟؟؟؟؟؟؟؟؟؟؟
ملقتش حد ..نزل عليا مؤثر صوت الرياح ال بتبقى في الصحرا وكومة أش من ال بتبقى معديه دايما في افلام الكاوبوي الامريكاني القديمه واصوات غربان تحوم حول المكان منظري كان وحححححححححش وانا وقفه لوحدي ومفيش حد خالص اتفرست فرسه كنت بجد عوزه ارجعله ارنه علقه عمره ما حد ادهاله
شويه ولقيت اغنيه عبد الحليم حافظ "أحضان الحبايب" بتلف في دماغي وال بدايتها "مشيت مشيت مشيت على الاشواك وجيت لاحبابي لا عرفو ايه وداك ولا عرفوا ايه جابك" فجأة لقيتني بغير اتجاهي وطلعت اجري اجري لحد اما حصلتهم لقيت سي شحته والباشا الحبيب شفيق ماشيين اول حاجه عملتها مسكت الشنطه وقمت رزعاهه في دراعه وانا بقوله "قدرت تمشي وتسيبني"
وبكل هطل وبلاهه وبنظره متخلفه جدا قالي" مخدتش بالي" بسرعه حطيت ايدي على بؤي خوفا من نزول فاصل من الشتايم القبيحه جدا على رأي واحد صحبنا ..
بصتله وقلت سبلي يا بت جايز يتكسف لقيته بيحاول يهرب زي ما تقول عامل عمله وبيخلع عوزه اثبت امه مش عارفه روحت لشحته قولتله "هوه في ايه يا بني هوه ماله في ايه؟؟" قال يرد وكل ال طالع عليه "روحي يا سندس دلوقتي روحي"
"لا قال اروح قال انا قتيلته انهارده يا اعرف في ايه يا هتفضلوا هنا لبكره مش مروحه " كل ده وانا قلبي بيقولي قوليهاله يا عبيطه قبل ما يقولهالك ..يقول ايه هوه احنا في سبق..
وقفت بعيد وفي جيبي ام العسليه الفقر دي والباشا حن وجه وقف وعاملي فيها رشدي اباظه وصدرلي وش الجزمه وقالي" احنا مش هينفع نكمل"
كل ال كان في دماغي ساعتها طيب مين هياخد العسليه ام 75 قرش مش حرام تترمى.. وحاجه تانيه كمان الكوتشي ال في رجلي صعب انو يتقلع طيب اخبطه بايه..عملت فيها شاديه وعيطلي دمعتين ودورت وشي وخدت جيست "بلغه المسرح يعني وقفت وقفة مميزه باتجاه معين" اجيبه كده مفيش فايده اجيبه كده مفيش فايده وحبه اشتغلت الاسطوانه بتاعت مش عايز اظلمك معايا وانا عندي اخوات بنات وانا مش في ايدي حاجه اعملهالك والكلام العوء ده اسفه على الالفاظ اخر اما زهقت قولتله خلاص انت هتقرفني ليه براحتك يا عم ..
لا وقال شحته بيقنعني ان مفيش حد تاني وان يعني الباشا فاق فجأه لقى نفسه وظروفه منيلين ماحنا عرفين الكلام ده من زمان مش لسه نازل امبارح الصبح
عموما طلبت من شحته يوصلني عشان اركب واروح وبالمره اديله العسليه النحس دي................
قال وأنا ال كنت فاكره
ياااااااااااسلام ,أول كلمه طلعت مني أول اما شوفته بيتكلم عليها قولت في نفسي اه يا بت يا سندس لو ترتبطي بواحد زي ده, وفجاه لقتني بقوله " هوه انت مش عندك اخوات صبيان" رد عليا وكان مستغرب اوي كأني سألته سؤال جديد متسألش قبل كده وقالي" أه عندي بس اشمعنه؟؟"
قولتله اصل بيني وبينك انا نفسي في حد زيك كده, وسبحان الله زي ما تقول كانت ابواب السما مفتوحه ساعتها واتكتبتلي ولسه بعاني يلا مش مشكله, المهم اننا فضلنا نتكلم عنو وعنها لدرجه اني كنت خلاص بدأت اقتنع تمام انو مش هيكمل معاها أصل مفيش واحد بيتكلم عن واحده كده الا لو كان خلاص بيفركش..عموما ده مأثرش معايا كتير فضلنا اصحاب فتره لحد أما حصل المتوقع..بسأله عليها لقيته بيقولي "اتخطبت" جالي حاله من الذهول مع القليل من الهطل المؤقت..
ماكنش على وشه اي تعبير يوضح انا المفروض اقوله ايه, اضحك واهرج وارمي افهات ولا اواسيه عموما مش هتفرق , المهم اني قولتله خيرها في غيرها ربنا يرزقك ببنت الحلال ال تسعدك وكنت شويه وهشحت عليه, بدأ حاله من الالتزام في كل حاجه في حياته حتى انا وقتها استغربت بس بعد كده مستغربتش خالص أصلها بعد كده لما سألت اصحابه لقتها عاده..
اهو جالي البحر لحد عندي عبيطه لو ما رمتش نفسي ولا ايه, ارتبطنا كما كنت اتمنى وبعدها ظهر الوجه الاخر للعمله لا وقال وأنا ال كنت فاكره
اذ فجأة بدأت احس ان الملاك البرئ ال كنت هموت عليه ماهو الا وجه تاني خالص ماهو مش بيقولك عرفت فلان أه عشرته لا..اهو هوه ده بقى فضلت معاه شهر عرفت ال فيها لا في حب بقى ولا تسبيل ولا الكلام ال البنات نفسها في ده ال كنت أنا منهم يعني كل ال كان يهمه في الموضوع كله اصحابه شغله ماهو الباشا فنان وده ال انا هحكيه بعد كده
أنا حتى أياميها كنت لابعرف اطبطب ولا ادلع ولا الكلام ده خالص كل اما كان يضايقني كنت اشتغله في الازرق" بص يا بني الليله مش طلباك خالص يا تتعدل ينفضها سيره انا مش ناقصه وجع قلب" والمشكله انه كان بينفض ولا كأنه سمع حاجه لحد أما اتدبست معاه في شغل في أجازه نص السنه ولا فتحت بؤي زي الجزمه ماهوه احنا لما كنا فضيين مكنش فضيلي تخيلو بقى لما نبقى مشغولين
والليله كلها اتلمت في اسبوعين لكن بدأت احس انو مش طبيعي وان في حاجه بدأت تشغله عني بس مش الشغل وده في الخيبة القادمه
الاشتراك في:
الرسائل (Atom)